Dr Häfale en Auschdralien

A GRIMMI AUF OBERSCHWÄBISCH 

Wer des grad läsa kah, wird au koi Broblem hann, des ganse Buach zom läsa. A baar Sädz send nadierlich au auf Hochdeidsch ond sogar auf Englisch gschrieba - ´s läbad ja ned bloß Schwoba en Auschdralien, wo dia Schdory sich haubdsächlich abschbield.

Dia Gschichd handeld vom Haubdkommissar Siggi Häfale, der eigendlich em Raum Ulm-Bibrach läbd ond do seiner Arbad nochgohd. Auf Grund von ma Mord, den er  ohbedingd aufglära will, hod´s´n desmol jedoch gladd nach Auschdralien verschlaga.

 

Ob´s schdemmd odder ned, was i do grad behaubdad hann, kennad Ihr weider onda en ra Läsebrob sälber beurteila - ´s isch hald, wia Alles, Gschmaggsach.

Hier können Sie das Buch bestellen.

 

ISBN 978-3-00-050562-1

Läsebrob:

 

Nach ma herzlicha Abschied von dr Moni send boide dann zrigg gfahra zom Hotäll. Gschwädzd hend se ned viel, weil se scho miad warad. Do ahkomma, hod dr Häfale da Manne gfrogd, ob´r no gschwend em Zemmer Bilder von seiner Familie sähja wolld ond weil´r ja doch scho a bissle neigierig war, isch dr Manne hald no kurz midganga.

Nachdem se beim Pordjeh griassend vorbei zom Aufzug gloffa ond en da dridda Schdogg naufgfahra send, hod dr Häfale sei Kärdle mid´m Magnedschdroifa – friehjer hod ma ja no Schlissl ghed – durch´s Dierschloss zoga ond – kligg – isch dia Dier au scho wia von Goischderhand aufganga.

Wia dr Häfale ´s Lichd ahgmachd hod, hod´s boide au schier d´Schbroch verschlaga. „Heiligsblächle …“, ond „Himmelherrgoddsagramendnoamol …“, war allas, was aus denne Zwoi rauskomma isch.

Der Ahbligg von dem Zemmer war a reines Chaos. Älle Schubbläda warad rausgrissa, d´Schrangdiera send offa gschdanda ond dr kombledde Inhald war ieber´s ganze Zemmer verdoild, auf´m Bedd ond auf´m Boda.

„Siggi, hod di dei Frau vielleichd verlassa, weil da a glois Broblem mid dr Ordnung hosch?“

„Mensch, Manne, mir isch grad ned nach ma Widzle zumude, des kahsch mr glauba! Als i ganga ben, war des Zemmer biggobello sauber. I kah mir gar ned vorschdella, warom des oiner doa hod!“

„Des isch doch glar, Siggi, do hod oiner ebbas gsuachd. Was moinsch, solla mr d´Bollizei ruafa, bevor mir irgendwelche Schbura wia Fengerabdrigg oddr so verwischad, oddr moinsch, mir sollad´s sei lassa?“

„Laß mi erschd mol gugga, ob irgendebbas fehld. Dia kennad ons beschdimmd au ned weiderhälfa ond Grimminalischda semmer ja selber.“

En Nullkommanix – Routine isch Routine – hod dr Häfale seine Sacha durchguggd ghed.

„´s fähld ieberhaubd nix, Manne. Des kah i mid Sicherheid saga, weil i meine Koffer ja selber paggd hann. Wenn i no wissd, was der – oddr dia – gsuachd hend. Mir kennad ja da Pordjeh raufkomma lassa ond froga, ob au no en andre Zemmer eibrocha worra isch.“